Adliya vazirligi yangi tanlov e`lon qildi. Unda 18 yoshga to`lgan O`zbekistonning barcha fuqarolari ishtirok etishi mumkin.
Adliya vazirligi fuqarolarning huquqiy va ijtimoiy faolligini yanada yuksaltirish, huquqiy savodxonligini oshirish, aholi orasida keng ko`lamli targ`ibot ishlarini amalga oshirayotgan huquq targ`ibotchilarini aniqlash va ularni munosib ravishda rag`batlantirish maqsadida “Eng yaxshi huquq targ`ibotchisi” tanlovini o`tkazadi. Bu haqida Adliya vazirligining “Huquqiy axborot” kanali xabar bermoqda.
Tanlov quyidagi 10 nominasiya bo`yicha o`tkaziladi:
- “Huquqiy targ`ibotdagi fidoyiligi uchun”;
- “Huquqiy madaniyatni targ`ib qiluvchi eng yaxshi mutaxassis”;
- “Huquqiy madaniyatni targ`ib qiluvchi eng yaxshi jurnalist”;
- “Huquqiy madaniyatni targ`ib qiluvchi eng yaxshi OAV”;
- “Huquqiy madaniyatni targ`ib qiluvchi eng yaxshi bloger”;
- “Huquqiy madaniyatni targ`ib qiluvchi eng yaxshi sayt”;
- “Huquqiy targ`ibotdagi eng yaxshi innovasion loyiha”;
- “Mahallada huquqiy madaniyatni yuksaltirishdagi faolligi uchun”;
- “Huquqiy targ`ibotdagi eng yaqin hamkor”;
- “Eng yosh huquq targ`ibotchisi”.
Tanlov Mustaqillik bayrami arafasida o`tkaziladi. Unda mutaxassisligi va kasbidan qat`iy nazar, O`zbekistonning 18 yoshga to`lgan barcha fuqarolari ishtirok etishi mumkin.
Tanlovda ishtirok etish istagini bildirgan har bir nomzod hujjatlari va materiallarini tanlov tashkiliy qo`mitaning ishchi organiga ariza bilan topshiradi.
Arizaga quyidagi hujjatlar va materiallar ilova qilinishi lozim:
• nomzodning pasport nusxasi;
• nomzodning rezyumesi;
• nomzodning so`nggi bir yil mobaynidagi jamiyatda huquqiy ong va huquqiy madaniyatni yuksaltirish, aholining huquqiy savodxonligini oshirish borasida amalga oshirgan ishlari va alohida yutuqlari (matbuotda chop etilgan va veb-saytlarda e`lon qilingan maqolalar, bukletlar, plakatlar, risolalar, savol-javob va sharhlovchi qo`llanmalar, foto va videomateriallar hamda huquqiy targ`ibot olib borilganligini tasdiqlovchi boshqa hujjatlar).
Hujjatlar yilning 25 iyuliga qadar qabul qilinadi. Tanlovga belgilangan muddatdan so`ng topshirilgan hujjatlar va materiallar ko`rib chiqilmaydi.
G`oliblarga planshet, smartfon kabi qimmatbaho esdalik sovg`alari va pul mukofotlari topshiriladi.
Ushbu tanlov O`zMTRK, “Turonbank” va O`zbekiston elektron ommaviy axborot vositalari milliy assosiasiyasi bilan hamkorlikda tashkil etilmoqda.
