2019 йилнинг 16 сентябрь куни Тошкент шаҳар Шайхонтоҳур тумани “Ўзбекистон” МФЙ, Хўжайли 1-берк кўчасида жойлашган 1-уйда ёнғин содир бўлди.
Ўзбекистон Республикаси ФВВ ЁХББ ОАВ билан ҳамкорлик қилиш бўлинмаси маълумотида айтилишича, воқеа жойига етиб борган ёнғин ўчирувчиларнинг тезкор ҳаракатлари натижасида қўшни уйларга аланганинг тарқалиши олди олинган. Ёнғиндан уйнинг 250 кв. метр майдони сақлаб қолинган.
Ҳодиса натижасида тан жароҳати олган ва ҳалок бўлганлар қайд этилмади. Бироқ ёнғин ҳақида аланга майдони кенгайиб кетгандан сўнг хабар берилган. Воқеа жойига 6 та ёнғин ўчириш бўлинмалари етиб борган, бу вақтда иморатнинг асосий том қисмида аланга авж олгани маълум бўлган.
Ёнғин оқибатида уйнинг 150 кв. метр майдони, хусусан томи ва шифти зарарланган. Ёнғиннинг сабаби ва моддий зарар миқдори аниқланмоқда.
