Мобил қурилмаларни рўйхатга олиш саналари ва тартиблари аниқ бўлди

Мобил қурилмаларни IMEI орқали рўйхатга олиш тартиблари белгиланди. Улар 1 ноябргача автомат равишда бепул, 1 декабрдан эса пулли асосда рўйхатга олинади.

Ўзбекистон ҳудудида фойдаланилаётган, сотиш ёки шахсий фойдаланиш учун олиб кириладиган ва ишлаб чиқариладиган мобил қурилмаларни рўйхатга олиш тартиби тўғрисидаги низом тасдиқланди, дея хабар қилди Адлия вазирлигининг расмий Telegram-канали. Вазирлар Маҳкамаси 17 сентябрь куни тегишли қарорини қабул қилди.

Қарорга мувофиқ, мобил қурилмалар:

• 2019 йил 1 ноябргача — уларни автоматик тарзда мобил алоқа операторлари тармоқларига улаш (активлаштириш) орқали бепул асосда;
• 2019 йил 1 ноябрдан — жисмоний шахслар, импорт қилувчилар ва ишлаб чиқарувчи корхоналарнинг мобил қурилмаларни халқаро ўзига хос идентификация кодлари бўйича рўйхатга олиш тизимига мурожаат қилиши орқали бепул, 2019 йил 1 декабрдан эса пулли асосда рўйхатга олинади.

Низомга кўра, мобил қурилмаларни рўйхатга олиш Тизим оператори ёки Тизим рўйхатга олувчисига мурожаат бўйича амалга оширилади.

Аввал рўйхатга олинган мобил қурилмалар қайта рўйхатга олинмайди.