Жорий йилнинг 26-30 август кунлари республикамизнинг барча ҳудудлари бўйлаб “Буюк аждодларга муносиб ворис бўлайлик” шиори остида I ёшлар фестивали ўтказилади.
Ўзбекистон ёшлар иттифоқи томонидан мамлакатимиз ёшларини буюк аждодларимизга муносиб авлод қилиб тарбиялаш, уларда ватанга садоқат, илм-фанга муҳаббат, устозларга эҳтиром туйғуларини шакллантириш, иқтидорли ёшлар ташаббусларини ҳар томонлама қўллаб-қувватлаш, интилишларини рўёбга чиқариш, уларнинг жамиятда муносиб ўрин эгаллашларига кўмаклашиш ҳамда кекса авлод билан ёшлар ўртасида доимий мулоқот ўрнатилишига эришиш мақсадида ўтказилаётган фестивал жойларда қуйидаги саналара ўтказилади:
26 августда Навоий, Бухоро, Наманган вилоятлари ва Қорақалпоғистон Республикасида;
27 августда Хоразм, Андижон, Сурхондарё ва Сирдарё вилоятларида;
28 августда Фарғона, Қашқадарё, Самарқанд, Жиззах ва Тошкент вилоятларида;
29 августда Тошкент шаҳрида.
Фестивал давомида Президентимизнинг 5 та ижобий ташаббуси асосида спорт мусобақалари, китоб-савдо ярмаркалари, ёш тадбиркорлар маҳсулотлари кўргазмалари, фахрий ўқитувчилар, ижодкор ёшлар билан учрашувлар, “Робототехниклар танлови” ҳамда бир-биридан қизиқарли бошқа тадбирлар ташкил этилади.
Ўзбекистон ёшлари иттифоқи барча ёшларни фестивалда фаол иштирок этишга чорлайди.