Тўрақўрғон иссиқлик электр станцияси қисман август ойининг иккинчи ярмида ишга тушадиган бўлди. Йил охирига қадар ИЭС тўлиқ қувватда ишлашни бошлайди. Бу орқали эса Фарғона водийсини чироқ ўчиши муаммоси ҳал этилади...
Нодирбек Насибалиев, Тўрақўрғон ИЭС бош муҳандиси:
— Наманган вилоятида бунёд этилаётган Тўрақўрғон ИЭСда синов ишлари деярли тугаб, биринчи буғ-газ турбинасини тармоққа улаш ва қувват бериш бўйича сўнгги тайёргарлик ишлари кетмоқда. ИЭС август ойида ишга туширилади. Ёз ва қиш мавсумлари Фарғона водийсида истеъмол кўрсаткичи 1800 МВтни ташкил этади. Тўрақўрғон ИЭСнинг ишга туширилиши эса электр-энергиясига бўлган ушбу талабларни бирмунча қондиришга хизмат қилади.
Фарғона ИЭС эҳтиёжни 70-80 % қоплайди!
— Август ойи иккинчи ярмида ИЭСнинг биринчи блок буғ-газ қурилмаси ишга туширилади ва дастлаб 300 МВт электр-энергияси ишлаб-чиқарилади. Бу Наманган вилоятининг электр-энергияга бўлган эҳтиёжини 70-80 % қоплайди. Биринчи энергия блокимиз батамом ишга тушганида Наманган вилояти тўлиқ энергия билан таъминланади.
Бу замонавий иссиқлик электр станцияси бошқа электрстанциялардан афзаллигига ҳам тўхталиб ўтсак. Электр энергия таннархи бошқа иссиқлик электр станцияларникидан арзонлиги билан ажралиб туради. Мисол учун, 1 кВт/с электр энергияни ишлаб чиқариш учун 220 грамм шартли ёқилғи сарф бўлади. Ҳозирда ишлаб турган эски энергия блокларимиз қиладиган сарфдан икки баробар камдир. Бундан ташқари ИЭС юқори аниқликда ишлайди, атроф муҳитга зарар етказмайди.
Маълумот ўрнида:
ИЭСнинг биринчи буғ-газ қурилмаси тўлиқ сентябр ойида, иккинчиси эса жорий йил декабр ойида ишга туширилади. Натижада Фарғона водийси истеъмолчилари учун 900 МВт қўшимча қувват ишлаб чиқарилади ва бу водий аҳолиси истеъмол қилаётган электр энергиясининг тенг ярмидан кўпни ташкил этади.
Қизиқарли фактлар
