Таниқли футбол мутахассиси Эктор Купер бошчилигидаги Ўзбекистон миллий терма жамоаси 28 майдан 12 июнга қадар йиғин ўтказади.
Мазкур йиғин доирасида вакилларимиз учта ўртоқлик учрашувида майдонга тушишни режалаштирган. Жумладан, ФИФА кунлари доирасида ташкил этилган ушбу йиғин доирасида дастлабки ўйин 2 июнь куни Аланья шаҳрида маҳаллий Туркия терма жамоасига қарши бўлиб ўтади.
Шу мақсадда бугун Ўзбекистон делегацияси Тошкент-Истамбул-Анталия йўналиши бўйлаб Туркияга жўнаб кетди. Туркия терма жамоасига қарши ўртоқлик ўйини 2 июнь куни Аланья шаҳридаги "Alanya Stadium"да ўтказилади.
Терма жамоамиз аъзолари 3 июнь куни ярим тунда Тошкентга қайтиб келади ва йиғинни пойтахтимизда давом эттиради. Вакилларимиз 7 ва 11 июнь кунлари Тошкентдаги "Миллий" стадионда КХДР ҳамда Сурия терма жамоаларига қарши ўртоқлик ўйинларида майдонга тушади.
Эслатиб ўтамиз, Туркиядаги ўйинда легионер футболчиларимиздан Икром Алибоев ва Достон Турсунов терма жамоага ёрдам бериша олмайди. Улар 3 июндан терма жамоа йиғинига қўшилади ва КХДР ҳамда Сурияга қарши ўйинларда майдонга тушиши мумкин.
