Хабар берганимиздек, Таиланднинг Бангкок шаҳри мезбонлик қилаётган бокс бўйича Осиё чемпионатида бундан бироз аввал ярим финал жанглари бошланди. Бугунги жангларда 9 нафар боксчимиз рингга кўтарилишидан хабарингиз бор.
Дастлаб 49 кг.гача бўлган вазн тоифасида рингга кўтарилган ҳамюртимиз Нодиржон Мирзаҳмедов финал йўлланмасини қўлга киритди. У финал остонасида Қирғизистон терма жамоаси аъзоси Мирлан Туркбаи Уулуни очколар ҳисобига кўра мағлуб этди.
Унинг финалдаги рақиби ҳам маълум бўлди. Ушбу вазнда ғолибликка даъвогарлардан бири қозоғистонлик Темиртас Жусупов ярим финал жангида рингга чиқа олмади. Натижада ҳиндистонлик Дипак жангсиз финалга йўл олди ва у Мирзаҳмедовга қарши олтин медаль учун жанг қилади.
Ҳозиргина Осиё чемпионатининг 56 кг.гача вазн тоифасидаги ярим финал босқичидан ўрин олган жанг ўз якунига етди. Унда терма жамоамиз аъзоси Миразизбек Мирзаҳалилов филиппинлик Педрес Баутистага қарши жанг ўтказди. Уч раунд тўлиқ давом этган жангда Миразизбек рақибини очколар ҳисобида мағлуб этди. Шу тариқа, иккинчи боксчимиз ҳам финал йўлланмасини қўлга киритди. Олдинда яна етти нафар боксчимиз турибди ва уларга ҳам омад тилаймиз.
Эслатиб ўтамиз, Осиё чемпионатининг ярим финалига Ўзбекистондан 9 нафар боксчи етиб келган бўлса, қўшни Қозоғистонда бу кўрсаткич 11 нафарни ташкил қилган эди.
