Жисмоний тарбия ва спорт вазирлигига Осиё каратэ федерацияси бош менежери Винсент Чен бошчилигидаги делегация ташриф буюрди. Бу ҳақда вазирлик матбуот хизмати хабар беради.
Учрашувда Жисмоний тарбия ва спорт вазирининг биринчи ўринбосари Ойбек Қосимов, Ўзбекистон каратэ миллий федерацияси раиси Аламжон Муллаев ҳамда федерация Бош котиби Камолиддин Ходжиниязов иштирок этди.
Тадбирда асосан каратэ WKF бўйича 2019 йилги Осиё чемпионатини Ўзбекистонда ташкил этиш масаласи муҳокама қилинди. Шунингдек, томонлар каратэни юртимизда янада оммалаштириш, унинг моддий-техник базасини мустаҳкамлаш, спортчиларимизни нуфузли мусобақаларга тайёрлаш бўйича амалга оширилиши лозим бўлган ишлар ҳақида ўзаро фикр алмашди.
Учрашувда Ойбек Қосимов Осиё каратэ федерацияси делегацияси аъзоларига сўнгги йилларда юртимизда каратэни оммалаштириш йўлида амалга оширилаётган ишлар ҳақида батафсил маълумот бериб, пойтахтимизда Осиё чемпионатини юқори савияда ташкил этиш бўйича барча чоралар кўрилишини маълум қилди.
“Бугунги кунда Президентимиз томонидан юртимизда жисмоний тарбия ва спортни оммалаштиришга алоҳида эътибор қаратилмоқда. Шуни мамнуният билан таъкидлаш лозим, мамлакатимиз спорт турлари бўйича бир қатор жаҳон ва Осиё чемпионатларига мунтазам равишда мезбонлик қилиб келмоқда. Хусусан, жорий йилда Ўзбекистон 34та нуфузли халқаро мусобақаларга мезбонлик қилиши режалаштирилган. Каратэ WKF бўйича қитъа биринчилигига ҳам муносиб мезбонлик қилиш бўйича барча имкониятлар ишга солинади,” – деди О.Қосимов.
Ўз навбатида жаноб Винсент Чен ҳам чемпионат олдидан мавжуд шароитлар билан танишиш ва ушбу масала юзасидан музокара олиб бориш мақсадида юртимизга келганини таъкидлади.
“Яна Тошкентда эканлигимдан бағоят хурсандман. Пойтахтингиз менда катта таассурот қолдирган. Бу ерда ўзимни жуда ажойиб ҳис қиламан. Юртингизда жисмоний тарбия ва спортга қаратилаётган эътиборни ўзбекистонлик спортчиларнинг нуфузли мусобақаларда қўлга киритаётган натижаларидан ҳам кўриш мумкин. Аҳоли сонидан келиб чиқадиган бўлсак, ютуқларингиз аҳолиси анча кўп ва иқтисодиёти ривожланган айрим давлатлардан юқори. Ташрифим давомида мавжуд инфраструктурани ўргандим. Тошкент нафақат қитъа биринчиликлари, балки жаҳон миқёсидаги мусобақаларни ўтказишга ҳам тайёр, деб ўйлайман”, – деди жаноб Винсент Чен.
Якунда томонлар жорий йил июль ойида пойтахтимизда Токио-2020 олимпиадасига лицензиялар ўйналадиган Осиё чемпионатини ўтказишга келишиб олишди.
Дарвоқе, пойтахтимиз қитъа чемпионатига мезбонлик қилиш ҳуқуқини ўтган йили қўлга киритганди. Аммо, кейинчалик Ўзбекистон каратэ миллий федерацияси бошқарувида юз берган ўзгариш ва юзага келган тушунмовчиликлар туфайли Осиё каратэ федерацияси катталар ўртасидаги қитъа чемпионати мезбонлигини Тошкентдан олиб қўйган эди. Ниҳоят, яна ҳаммаси изга тушди ва биз учун муҳим бўлган мусобақа мезбонлиги яна Ўзбекистон каратэ миллий федерациясига қайтарилди.
