“Ўзбеккино” миллий агентлигининг хабар беришича, Республика кинопрокат маркази шу йилнинг 18 март куни Хитойнинг Гонконг шаҳрида бошланган 23-Халқаро “FILMART” кино ва телевизион фильмлар кинобозорида иштирок этиш оркали илк маротаба ўзбек миллий фильмларини халқаро майдонда тақдим қилмокда.
Мазкур йирик тадбирнинг иккинчи иш кунидан олинган маълумотларга кура, дунёнинг 40 га якин давлатларидан иштирок этаётган 850 тага якин компаниялар, дистрибьютерлар ва харидорлар қаторида мамлакатимиз вакиллари ҳам ўз маҳсулотларини халқаро кинопрокатга чиқариш, чет эл телеканалларига сотиш ва юртимизда хамкорликда фильмлар ишлаб чиқариш масалалари бўйича хорижий ҳамкорлар билан музокаралар ўтказиб, шартномалар имзолагани тўғрисида маълумотлар берилди.
Жумладан, Гонконгннинг “DIGITAL CONTENT Сo., LLC” ҳамда АҚШнинг “ALL RIGHTS ENTERTAINMENT” дистрибьютерлик компаниялари бундан буёнўзбек миллий фильмларини барча халқаро кинобозорларда тарғиб килиш ва уларни сотишда Республика кинопрокат маркази билан ҳамкорлик килиши келишилган.
Бундан ташқари, Сингапурнинг “BOMANBRIDGE” компанияси кинобозорга олиб борилган “Ўзбекистон – Ислом цивилизацияси маркази”, “Хожаи жаҳон Абдухолиқ Ғиждувоний”, “Қадимий Бухоро”, “Хожа Баҳовуддин Нақшбанд” каби ҳужжатли фильмларни жанубий-шарқий Осиёдаги мусулмон аҳолига эга мамлакатларда Рамазон ойи арафасида телеканалларда кенг намойиш килиш учун харид килиш таклифи билан чиққан.
Шунингдек, Франция, Хитой, Жанубий Корея, Япония, Ҳиндистон, Малайзия, Индонезия ва Тайван каби бошқа кўплаб мамлакатлар кинокомпаниялари Ўзбекистонда фильмлар суратга олишга қизиқиш билдириб, мавжуд кинолойиҳаларни мамлакатимизда биргаликда амалга ошириш бўйича дастлабки келишувларга эришилган.
Эътиборлиси шундаки, ушбу кинобозорда иштирок этишини ташкил этишишларига консультант сифатида жалб этилган Италиянинг “RIA” телевидениеси вакили ҳамда кўплаб халқаро кинофестиваллар ва кинобозорлар ташкилотчиси, тажрибали мутахассис Карло Антонио Жентайл Республика кинопрокат марказига яқиндан кўмаклашмокда.
Кинобозор ўз ишини давом эттирмоқда.Эришилган келишувлар тўғрисида маълумотлар бериб борилади.
