Долзарб мавзулар Фото

Башорат 2019: Саратон

Теглар:
Добавлено: 15.01.2019, 11:25

Узоқ кутилган орзулар рўёби... (22 июнь – 22 июль)

Умумий башорат

“Тўнғиз йили”да “югур-югурлар” билан овора бўласиз. Саратон буржи вакиллари оилапарвар бўлсалар-да, бу йил дўстлар ва яқинлар билан вақт ўтказишлари бироз қийин бўлади. Бироқ ишда кўпгина муваффақиятларни қўлга киритиб, олдинга силжишлар кузатилади. Тадбиркорлар эса янги ҳамкорлар билан битим тузишга эришадилар. Фойдали таклифларни рад этмасалар 2019 йил сердаромад ва унумдор бўлади. 2019 йилда якка эмас, балки жамоа билан ишлаган маъқул. Ташаббускорликни ўз қўлингизга олинг.

Яхши инсонлар билан дўстлашиш ва самарали натижаларга эришиш мақсадида киришимли бўлиш лозим. “Тўнғиз йили”да сизни янги саёҳатлар ва сафарлар кутмоқда. Қариндошлик ришталарини сақлаб қолиш учун яқинларингизни ҳам унутманг.

Ҳаракат! “Саратон”лар кўпроқ ҳаракатда бўлиб, спорт билан шуғулланса, 2019 йилда касалликлар нари кетади. Агар ортиқча вазндан азият чекаётган бўлсангиз сузиш билан машғул бўлинг. Иммунитетингизни мустаҳкамлашни ҳам унутманг.

“Ит йили”да ўзларини хотиржам ва беғам сезган бу бурж вакиллари йил аввалида ўзларини бироз йўқотиб қўйгандек сезишади. Аммо режаларни амалга ошириш ва хотиржамликни сақлаб қолиш учун йил эгаси билан дўстлашишга бироз вақт талаб қилинади. Аммо ортиқча қайғуришга ҳожат йўқ. Агар ҳамма нарсага умид ва ишонч билан қарасангиз, “Тўнғиз йили”да ҳам барчаси ўйлаганингиздек бўлиши аниқ.

Баҳорга келиб енгил нафас олиш ва шахсий ишларни режалаштириш мумкин. Март ойи бошида ишхонада раҳбарларнинг қўшимча ҳурмат-эътиборига сазовор бўлиш билан бирга ўзингиз ҳам бир шахсий бизнесингизни очишингиз кутилмоқда.

Ёзда кўпчилик янги уй сотиб олиши ёки яшаб турган уйини таъмирдан чиқаришлари мумкин. Аммо юлдузлар хўжалик ишларидаги бундай ўзгаришларга яхшилаб тайёргарлик кўришни тавсия этмоқда. Энг маъқул йўл мутахассисларга мурожаат қилиш. Ўзингиз бу ишларнинг уддасидан чиқа олмайсиз.

Молиявий масалага келсак, кутилмаганда қўшимча даромадга эга бўлиб, бу уй борасидаги режаларингизни амалга оширишга қўл келади.

Мунтазам равишда даромад топасиз. Қулай шартномалар, келишувлар ва ютуқларни қўлга киритишингиз ҳам эҳтимолдан холи эмас. Юлдузлар барча ишда тежамкорроқ бўлишни тавсия этишмоқда. Жамғариб қўйилган маблағ, қачондир албатта асқатади.

Куз фаслининг бошида айрим “Саратон”лар бош­қа ишга жойлашадилар. Бошқалари эса бирваракайига иккита ишда ишлаш имкониятига ҳам эга бўлишади. Бунга табиатан ҳаракатчан ва иродали эканингиз кўмак беради.

Аммо ўз вақтида ҳордиқ чиқаришни, табиат қўйнида дам олишни ва пиёда юришни унутиб қўйманг.

Декабрь ойи, ҳақиқатан ҳам, сирли кечади. Сиз йил якунида ўзингизни бахтли ва яхши ҳис этасиз. Бу юқори кайфият билан атрофдагиларни ҳам хушнуд этишни уддалашингиздан далолат.

ШАХСИЙ ҲАЁТ

Шахсий ҳаётингиз ҳам рисоладагидек кечади. Қариндошлар билан муаммолар юзага келмайди.

2019 йилда уй-рўзғор ишларига жиддий қаранг. Агар уйингиз таъмирталаб бўлса, йилнинг бошиданоқ таъмирлаш ишлари учун маблағ тўплашни бошланг.

Ҳали оила қурмаган бурж эгалари, ўзингизга мос жуфтликни танлаб оила қуриш вақти келди. Севги борасида ташаббусни ўз қўлингизга олинг. Юлдузлар таъбирига кўра, баҳор якунида ёки июль ойида ниҳоят ўзингиз орзу қилган инсонни учратасиз.Оила қуриш жиддий қарор, шу сабабли катталар маслаҳатига қулоқ тутинг.

“Тўнғиз” мучали сизга ўзига ташқаридан назар ташлашни маслаҳат бермоқда. Айтмоқчимизки,ташқи кўринишингиз ва кийиниш услубингизни ўзгартиришдан чўчиманг. Фақатгина ўзгариш борасида мутахассислар ёрдамидан фойдаланинг.

САЛОМАТЛИК

Хўш, юлдузлар 2019 йилда саломатликни мустаҳкамлаш борасида қандай маслаҳатлар беришаётган экан? Эслаб қолинг, елка ва тананинг орқа қисмига қаратилган машқларни бажариш, спорт билан шуғулланиш, овқатланиш тартибига риоя қилиш ва тўйиб ухлаш 2019 йилги саломатликни мустаҳкамлашнинг энг осон усулидир. Эрталаблари югуриш ва тушликда уйқуга ён босмаслик ҳам сизни турли касалликлардан асрайди. Агар берилган маслаҳатларга амал қилинмаса, йил давомида шамоллаш ва руҳий зўриқиш билан вақт ўтади. Ҳаётга умидсизлик билан қарамасликка ҳамда ортиқча асабийлашмасликка ҳаракат қилинг. Зеро сизда асаб касалликларига мойиллик бор. 2019 йил кўчага чиқишдан олдин об-ҳавога қараб кийин­сангиз, саломатлигингиз хавф остида қолмайди. Меҳнатсеварлар гоҳ-гоҳида дам олиш ҳақида ҳам унутиб қўймасликлари лозим. Гарчи йил бўйи саломатлигингиз масаласида жиддий муаммо юзага келмаса-да, организм ва руҳиятни жисмонан зўриқишдан асранг. Бир жойда узоқ вақт ўтириб қолишдан ҳам тийилинг.Бу борада юлдузлар иш вақтида тез-тез қисқа танаффуслар қилишни тавсия қилишмоқда.

Овқатланиш тартиби ва меъёрлари ҳақида ҳам унутиб қўйманг. Мевалар, сабзавотлар, бўтқаларни кўпроқ истеъмол қилиб, иммунитетингизни мустаҳкмлаб боринг. Газли, спиртли ичимликлар, тамаки маҳсулотлари соғлиқ кушандаси саналади. Улардан узоқ юришингизга тўғри келади.

КАРЬЕРА

2019 йилда янги иш ва юқори мартабага эга бўласиз. Биламиз, бундай ўзгаришни узоқ кутгансиз. Шунинг учун янгиликни дўстлар даврасида нишонлашга нима етсин?!

Молиявий аҳволингизга “қора булутлар” хавф солмайди. Шунинг учун ёзга келиб саёҳат ёки янги уй-жой учун керакли маблағ тўплай оласиз. Аммо бунинг учун кўп тер тўкишингизга ва рақобатчилар билан бир майдонда куч синашишга тайёр бўлинг. Қайғурманг, муаммоларнинг ечимини топишда эътиборли кишилар сизга ёрдам беради. Фақат ҳар қандай вазиятда қонундан четга чиқманг.

“Тўнғиз йили”да тадбиркор ва ишбилармонларшахсий бизнесларини кенгайтириш имкониятига эга бўлишади. Бу ижодий йўналиш бўладими ёки тижорат — танлов сиздан. Аммо шартномалар имзолашда огоҳ бўлинг. Айниқса, чет эл ҳамкорлари билан келишувни синчковлик билан кузатинг.

Хасадгўйлар сизга тузоқ қўйишга ҳаракат қилишади. Бироқ “Тўнғиз” обрўингизни ва маблағингизни сақлаб қолишга ёрдам беради. Ҳали татбиқ этилмаган режалар ва ғояларингиз талайгина. Уларни йўлга қўйишда қариндошларингиз ёки дўстларингиз кўмак беради.Иш бошлаш учун бироз қарз олишингизга ҳам мумкин. Энг муҳими режани аниқ қилиш ва маблағни тўғри тақсимласангиз, бас. Ана шундагина баҳорга келиб, ишингиздан фойда кўрасиз.

АЁЛ "САРАТОН"ЛАР

Юлдузларнинг айтишича, ишга шўнғиб кетасиз, бироқ оила ва яқинларни ҳам унутманг. “Тўнғиз йили”да маънавий ўсиш ва билим олиш биринчи ўринга чиқиши лозим. Энг асосийси, ўзингизни қизиқтирган ишни топиб унинг ортидан мўмайгина даромад оласиз. 2019 йил аёл “Саратон”лар ўзлари истаган касбда фаолият юритишади. Айтганча, уйдан чиқмасдан, интернет орқали касбий маҳоратингизни ва билимингизни оширишингиз ва кўпгинақизиқарли маълумотларга эга бўлишингиз мумкин.

“Тўнғиз йили”да яқинларингиз билан келишмовчиликлар юзага келиши ҳам мумкин. Бунинг олдини олиш учунулар билан муносабатда эҳтиёткор бўлинг. Анчадан бери уришиб қолган инсонингиз билан муносабатларингизни тикланг. Юлдузлар 2019 йилда аёлларга бир гап­дан қолишни ва бошқаларга ён босишни маслаҳат беришмоқда. Кичкинагина ўзгаришлардан ҳам хурсанд бўлинг. Агар вақт ва қувватингизнинг қадрига етсангиз, ўз мақсадингизга эришасиз. Оилали бурж вакиллари болалар тарбиясига ҳам алоҳида аҳамият қаратишни унутманг.

Баҳор ойида саломатлигингизда жиддий муаммолар юзага келади, ўз вақтида малакали шифокорга мурожаат қилинг. Ёзда эса фирибгарлар тузоғига тушиб, алдов қурбонига айланиб қолишдан эҳтиёт бўлишингиз даркор.

ЭРКАК "САРАТОН"ЛАР

Бу йил эркак бурж вакилларнинг ўзига бўлган ишончи ошади. Энг асосийси умид қилишдан тўхтаманг. 2019 йилда нафақат ишингиз ўнгланади, балки молиявий аҳволингиз ҳам яхшиланади. Муаммоларни ўз вақтида ҳал этишга ватушкунликка тушмасликка ҳаракат қилинг. Бўйдоқ “Саратон”лар ва ниҳоят ўз жуфтларини топади.

Юлдузлар 2019 йилда эркак “Саратон”ларга ҳам бирор фойдали машғулот топишларини маслаҳат беришмоқда. Бу сизга яхши кайфият бахш этиб, илҳомлантиради. Шунингдек, салбий таъсирлардан ҳимоя қилади. Йил бошида ва март ойида пулларингизни автомашинани таъмирлатишга сарф қиласиз.

Google+
WhatsApp
VK
Telegram

Комментарии