Камчатка фалокатлар тиббий маркази шифокори Александр Просин самолёт бортида ўзбекистонлик аёлнинг ҳаётини сақлаб қолди, деб хабар қилди kp.ru нашри.
Шифокорнинг айтиб беришича, воқеа 10 декабр куни содир бўлган. Петропавловск-Камчатский шаҳридан Москвага 1731 сонли парвоз билан учаётган самолёт бортида йўловчилардан бирининг соғлиғи кескин ёмонлашгани ҳақида маълум қилинган.
Парвоз давомида аёлнинг ҳолати кескин ёмонлашади. У қорин бўшлиғида қаттиқ оғриқ борлиги ҳақида шикоят қилади. Александр Просин беморга оғриқ қолдирувчи муолажалар қилади ва 1,5 соат давомида унинг ҳаётини хавфдан сақлаб туради.
Ёқутистон аэропортида ноқулай об-ҳаво туфайли самолёт қўна олмайди. Шунда, самолёт яқин орадаги аэродром — Мирний шаҳрида шошилинч қўниб, беъмор тез ёрдам бригадасига топширилади.
Маълум бўлишича, парвозгача ўзбекистонлик аёлга Камчаткадаги клиникалардан бирида ўткир касаллик ташхиси қўйилган ва дарҳол касалхонага ётиши айтилган. Лекин у шифокорнинг тавсиясини эътиборсиз қолдириб, Тошкентга учишни маъқул кўрган.