Туркиялик режиссёр "Жалолиддин Мангуберди" ҳақида фильм олмоқчи

МАДАНИЯТ 16.10.2018, 09:46
Туркиялик режиссёр "Жалолиддин Мангуберди" ҳақида фильм олмоқчи

Ўзбекистон Республикаси Маданият вазирлигида Туркиянинг таниқли кино намояндаси, “Эртугрул” телесериалининг режиссёри Меҳмет Бўздағ бошчилигидаги делегация иштирокида матбуот анжумани ўтказилди, деб хабар бермоқда ЎзА.

“Жалолиддин Мангуберди” фильмини суратга олишда ҳамкорлик масалаларига бағишланган тадбирда юртимизнинг таниқли санъат ва маданият вакиллари, кинорежиссёр ва актёрлар иштирок этди.

Халқаро пресс-клуб томонидан ташкил этилган тадбирда Ўзбекистон Республикаси маданият вазирининг биринчи ўринбосари О.Назарбеков, “Ўзбеккино” миллий агентлиги бош директори Ф.Зокиров ва бошқалар мамлакатимиз киносаноатини ҳар томонлама ривожлантиришга алоҳида эътибор қаратилаётгани, бу соҳани равнақ топтириш учун чет мамлакатлар, хусусан, Туркия давлати билан ҳам кенг қамровли маданий алоқалар йўлга қўйилаётганини таъкидлади.

Сўнгги пайтларда турк киноижодкорлари томонидан тақдим этиб келинаётган кино маҳсулотлари халқимизнинг катта қизиқишига сабаб бўлмоқда. Жорий йилда эфирга узатилган сериаллар нафақат кино ихлосмандлари, балки ўзбек кино ижодкорларининг ҳам эътирофларига сазовор бўлди. Шу жиҳатдан ҳам “Эртугрул” телесериалининг режиссёри юртимизга таклиф этилди.

Хоразмшоҳлар давлатининг сўнгги ҳукмдори, моҳир саркарда бобомиз Жалолиддин Мангуберди Чингизхон бошчилигидаги мўғул қўшинларига қарши мардонавор жанг қилган, она Ватан тупроғини асрашга жон фидо қилган буюк сиймо сифатида тарихга кирган шахсдир. У жасурлиги, мардлиги билан бирга адолатли ҳукмдор бўлгани ҳақида ҳам тарихий манбаларда келтирилган. Шунинг учун ҳам турк режиссёрида у ҳақида тарихий фильм олиш ғояси туғилди.

13.JPG

– Мен жаҳон тарихи, хусусан, сизнинг буюк боболарингиз Жалолиддин Мангуберди, Соҳибқирон Амир Темур, Мирзо Улуғбек каби сиймоларнинг шонли ўтмишини чуқур ўрганиб чиққанман, – деди Меҳмет Бўздағ. – Уларнинг адолатлилиги мени доимо ўзига жалб қилган ва, албатта, уларнинг бирортаси ҳақида тарихий фильм олишни режалаштирган эдим. Эртугрул ҳам айнан адолат билан халқни бошқаргани учун у ҳақида фильм суратга олдик. Бу телесериалдан кейин бизга дунёнинг кўплаб мамлакатларидан ўзларининг тарихи ҳақида кино суратга олиш таклифи тушди. Лекин уларни рад этдим. Чунки мен буюк саркарда Жалолиддин Мангуберди ҳақида кино олишни мақсад қилганман ва агар бу борада ҳамкорлик келишувига эришсак, ажойиб фильм суратга олиш ниятидаман.

31.JPG

Анжуманда киноижодкорларимиз яратилаётган шарт-шароитлардан унумли фойдаланиб, халқимиз, айниқса, ёшларимизни истиқлол ғоялари руҳида тарбиялашга кўмаклашадиган, бой тарихимиз, буюк аждодларимизнинг бетимсол жасорати, замондошларимизнинг фидокорона меҳнатини акс эттирадиган фильмлар яратиш бугунги куннинг долзарб вазифаларидан экани қайд этилди.

Шарҳлар

Об-ҳаво: Тошкент
Валюта курси
1