«Ўзбекнефтгаз» АЖ ВА Франциянинг нефть институти қатор йўналишларда ҳамкорлик қилишни режалаштирмоқда

ИҚТИСОДИЁТ 09.10.2018, 15:51
«Ўзбекнефтгаз» АЖ ВА Франциянинг нефть институти қатор йўналишларда ҳамкорлик қилишни режалаштирмоқда

Ўзбекистон Республикаси Президенти Шавкат Мирзиёевнинг Францияга расмий ташрифига тайёргарлик доирасида жорий йилнинг 8 октябрь куни «Ўзбекнефтгаз» акциядорлик жамияти бошқаруви раиси в. б. Баҳром Ашрафхонов Франциянинг IFPEN Нефть институти вице-президенти Пьер-Анри Бижеард билан учрашди. Бу ҳақда «Ўзбекнефтгаз» АЖ матбуот хизмати хабар бермоқда.

Учрашувда икки томонлама муносабатларни янада ривожлантириш масалалари муҳокама қилинди ва Ҳамкорлик меморандуми имзоланди. Унда нефть-газ саноати соҳасида институт ва унинг шўъба компаниялари билан келгусидаги муносабатлар доираси ва йўналишлари белгилаб олинди.

Меморандумга мувофиқ ҳамкорликнинг бир қатор йўналишларини кўриб чиқиш режалаштирилган. Франциянинг Beicip Franlab компанияси билан геологик қидирув ишларини илмий жиҳатдан қўллаб-қувватлаш ва сармоявий блокларнинг салоҳиятини ўрганиш ҳамда ушбу компанияни мустақил аудитор ва эксперт сифатида жалб қилиш улар орасидадир. (7 октябрь куни «Ўзбекнефтгаз» акциядорлик жамияти делегацияси Beicip Franlab компанияси раҳбарияти билан учрашув ўтказган).

Шунингдек, Франциянинг Axens компанияси билан мавжуд бўлган қайта ишлаш қувватларида ишлаб чиқарилган маҳсулот сифатини яхшилаш учун минимал сармоя киритиш билан мақбул ечимларни ишлаб чиқиш режалаштирилган. Axens нефть ва газни қайта ишлаш ва нефть кимёси соҳасида дунёдаги етакчи компаниялардан биридир. Ушбу компания аввал ҳам Бухоро нефтни қайта ишлаш заводи қурилишига ва Фарғона нефтни қайта ишлаш заводини модернизация қилишга жалб қилинган.

Меморандум доирасида «Ўзбекнефтгаз» акциядорлик жамияти мутахассисларини ўқитиш, тайёрлаш ва қайта тайёрлаш бўйича IFPEN School билан ҳамкорлик ҳам кўзда тутилган. Унга кўра, Губкин номидаги Россия давлат нефть ва газ университетининг Тошкентдаги филиалида IFPEN School ўқув курслар ташкил этади; ўзбек мутахассислари Францияга IFPEN School да таҳсил олишлари учун жўнатилади.

Шу билан бирга, IFPEN билан «Ўзбекнефтгаз» акциядорлик жамиятида табиий газни чуқур қайта ишлаш бўйича инновацион марказни яратиш борасида ҳам яқин ҳамкорлик кўзда тутилган.

IFP энергетика, транспорт ва атроф-муҳитни муҳофаза қилиш соҳаларида юқори технологияли маҳсулотларни ишлаб чиқиш ва жорий этиш бўйича Франциянинг обрў қозонган давлат илмий-тадқиқот институти ва таълим масканидир. 2017 йил якунларига кўра, компания 2,6 минг лицензияни сотган. IFPнинг операцион харажатлар миқдори 278,2 миллион еврони ташкил қилади, жумладан, тадқиқотлар ўтказишга 232,9 миллион евро йўналтирилган.

Шарҳлар

Об-ҳаво: Тошкент
Валюта курси
1