Жорий йилнинг 13 сентябр куни Остона шаҳрининг "Шанхай" бозори ҳудудида ичида аёл кишининг жасади бўлган сумка топилди. Бу ҳақда newtimes.kz нашри хабар берди.
Ўша куниёқ полиция томонидан аёлнинг шахси аниқланди. У 26 ёшли Ўзбекистон фуқароси бўлиб чиқди.
Белгиланган суд-тиббий экспертиза хулосаларига кўра, аёл сил касаллигига чалинган бўлган, организмда ички органларнинг интоксикацияси рўй берган.
Олиб борилган тезкор-суриштирув ҳаракатлар давомида полиция томонидан 30 ёшли эркак аёлнинг ўлимида гўмонланиб, қўлга олинди.
Маълум бўлишича, у сўнгги уч йил давомида вафот этган аёл билан бирга яшаган ва уларнинг 2 ёшли ўғли бўлган. Аёл ётоқхонадаги ижара хонада касалликдан вафот этган. Эркакни аёлни дафн этишга имкони бўлмаган, шунда у жасадни хўжалик сумкасига жойлаб, "Шанхай" бозори ҳудудида қолдириб кетган. Ва ўша куниёқ шаҳардан чиқиб кетган.
Остона полициячилари томонидан эркак Туркистон вилояти ҳудудида ушланган.
