8-19 май кунлари Франциянинг машҳур Круазет соҳили бўйидаги Фестиваллар ва конгресслар саройида Канн фестивали бўлиб ўтишидан хабарингиз бор...
У ерда биринчи маротаба юртимиз павильони ташкил этилади.
Бу бўйича Кинематографияни ривожлантириш маркази дунёнинг биринчи рақамли халқаро кинофестивали Канн кино бозори дирекцияси билан шартнома имзолаган. Ўтган йилнинг ўзида мазкур тадбирда жаҳоннинг 118 мамлакатидан 12 мингдан ошиқ киши иштирок этган ва бу кўрсаткич йил сайин ортиб бормокда.
Павильон қатнашчилари кино бозорида турли мамлакатлардан ташриф буюрган меҳмонларга Ўзбекистон киноижодкорларининг фильмлари ҳамда мамлакатимизнинг бой кино локацияси ҳақида маълумотларни тақдим этиб, республикамизнинг маданий ва маънавий қадриятлари билан уларга яқиндан танишинтирадилар.
Шуниндек, павильонда 2018 йилнинг октябрь ойида бўлиб ўтадиган, шу йилдан бошлаб халқаро кинофестиваль мақомини олган "PROlogue", Республикамизда ташкил этилган Ўзбекистон кинокомиссияси ҳамда Республика кинопрокат маркази тақдимоти ҳам ўтказилади.
Ушбу тарихий воқеа Ўзбекистон Ёшлар Иттифоқи, Кинематографияни ривожлантириш маркази, "Ўзбеккино" Миллий агентлиги ҳамда Ёш киноижодкорлар кенгаши томонидан ташкил этилмоқда.
Кеча эса Ўзбекистондан ўнта ижодкор фестиваль томон - Францияга «учиб» кетишди.
