Суратли тест: японча усул билан имкониятларингизни баҳоланг

СУҒДИЁНА 28.02.2018, 12:07
Суратли тест: японча усул билан имкониятларингизни баҳоланг

Бугун осонгина, аммо жуда қизиқ тестни ишлаймиз. Натижа эса қувонарли бўлади — имкониятларингиз ва уларни занжирлаб турган сабабларни билиб оласиз. Қани, имкониятларингиз оламига кетдик? Самолётдами ё машинада, дейсизми? Буни ўзингиз ҳал қиласиз.

Йўриқнома

Қуйидаги олтита суратдан фақат биттасини танланг. Биринчи эътиборингизни тортгани, сизни кўпроқ ўзига жалб этгани ва улардан қай бирини бошқаришни исташингизга қараб, албатта.Кейин танловингизга берилган таърифни ўқинг.

Велосипед

Камина мана шу транспорт воситасини ҳайдашни ҳеч ўргана олмадим-да. Қўрқув бор! Аммо сизни бир пайтлари шайтон арава, дея айримларни таҳликага солган велосипедни учириб ҳайдашингизга ишонамиз. Йўғ-а, деяётган бўлсангиз, адашасиз. Ахир бир ишга киришдингизми, уддасидан чиқмагунча қўймайдиганлар тоифасидансиз-ку. Сизга велосипедда учиш иш бўлибдими? Фақат бир камчилигингиз бор-да, истаган чўққингизга чиқишингиз учун ўз кучингизгагина таянишингиз кераклигини баъзида унутиб қўясиз. Атрофдагилардан ёрдам таъма қилиш, уларнинг кўмагини кутиш сизга умуман ярашмайди. Ахир журъатли, орзулари ушалишига ишонувчи инсонсиз! Демак, олға!!! Ўзингизни қўлга олинг, кучингизга ишонинг. Қатъият, меҳнаткашлик ва ирода сизни ғалаба сари етаклайди. Уйғонинг, сизни буюк ишлар кутмоқда. Йўлингиз эса текис ва равон, велосипедни қатъият билан учириб ҳайдашингиз мумкин. Тўсиққа дуч келсангиз, уни айланиб ўтишни эплайсиз.

Машина

«Ана машинам, мана, машинам, биттасига ўтиринг, мадам!». Бу қўшиқни бекор тилга олмадик. Ана шу таронадаги каби шўхлик, хонанда Жаҳонгир Позилжоновникидек тезкорлик, ҳаракатчанлик, таваккалчилик феълингизга бегонароқ. Жуда майда қадамлар билан, сокин ҳаракатланасиз. Юрсамми-юрмасамми деб кўп ўйланасиз. Машиналар йўлида эмас, мақсадларингиз сари, албатта! Гўёки шошадиган жойингиз ҳам, унга елтувчи бирор восита ҳам йўқдек. Имкониятларингизни нафақат тўғри баҳолай олмайсиз, уларни умуман кўрмайсиз. Тезликни оширинг, жадаллашинг. Ахир ҳаёт ҳар доим ҳам бир текис кечмайди. Бугун ҳаракат қилиб қолмасангиз, эртага айни баҳорда қор ёғиб, таъбингизни хира қилади. Бемақсад яшаманг, нималарни истайсиз, келажагингиз қандай бўлишини хоҳлайсиз — аниқлаштириб олинг-да, катта қадамлар билан иккиланмасдан, қўрқмасдан ҳаракатни бошланг.

Автобус

Сиз яқинларингиз ва дўстларингизни жуда қадрлайсиз. Бошқаларга ёрдам бериш жону дилингиз. Ўзгаларнинг ташвиши, орзу-умиди билан бўлиб, ўзингизни унутиб қўясиз. Бу феълингиздан эса фойдаланишади, керак бўлса, суистеъмол қилишлари ҳам мумкин. Бошқаларнинг ҳаётига қадалиб қолган диққатингизни чалғитинг, яъни ўз мақсадларингиз сари йўналтиринг. Катта имкониятлар остонасида турибсиз! Фақат режаларингизни амалга оширингизга кимдир халақит бермаслигини таъминлашингиз талаб этилади. Бу ўз қўлингизда. Яъни қачонки сиз ҳамма ўзининг ҳаёти учун жавобгарлиги ва масъулиятни бўйнига олиши кераклигини тушуниб этсангиз, атрофдагилар ҳам нуқул шахсий манфаатларини ўйлаб, вақтингизни ўғирлашмайди. Тушунинг, меҳр-муҳаббат кўрсатиш учунўздан кечиб, ўзгаларга фидо бўлиш шартмас. Йўқ дейишни, яқинларингиз билан муштарак мақсадлар йўлидагина бирга ҳаракатланиб, баъзи-баъзида шахсий «машина»нгизда фақат ўзингизники бўлган орзу-истаклар сари отланишни ҳам билинг.

Поезд

Демак, сизнинг чиптангиз поездга. Марҳамат, жойингизга қулай ўрнашиб олинг. Аҳволларингиз қалай? Кайфиятлар-чи? Кўнглингиз нима тусайди? «Мени ҳеч ким безовта қилмасин», дейсизми? Нега? Нима учун ёнингизда шунча дилкаш инсонлар бўлса-да, улардан ўзингизни олиб қочасиз. Бегоналар ўз йўлига, аммо негадир яқинларингизнинг фикри, уларнинг ҳаётингизда тутган ролини ҳам гоҳ-гоҳида эмас, деярли ҳамиша эътиборга олмайсиз. Фақат ўзингизникини тўғри дейсиз, мустаҳкам девор билан ўралган қалъангизга қамалиб оласиз. Ён-верингизга бир назар солинг, яқин-узоқ танишларнинг фикр-мулоҳазаларига ҳам қулоқ тутинг. Шунда қўлингиздан нималар келишини таҳлил қилиш имконига эга бўласиз. Бу эса омад сари сизни етакласа ажабмас.

Яхта

Сиз эркин қушсиз! Ўз оламингизда учиб юраверасиз. Атрофингизда нималар содир бўлаяпти, бепарволик билан қарайсиз. Деярли уларга қизиқмайсиз ҳам. Іамма нарсага ақл билан ёндашиш, ҳис-туйғуларни бир четга суриб қўйиш — приципингиз. Сизни мақсадингиздан чалғитиш тугул хато йўлдан қайтармоқ ҳам душвор. Аниқ режалар билан ишлашингиз, ўз фикрингизда собит туришингиз бир томондан яхши. Аммо осмон узилиб, ерга тушса ҳам, икки оёғингизни бир этикка тиқиб олишингиз қанчалик ўринли? Боши берк кўчага дуч келганда, бошқа чиқиш йўлларини излаб кўринг. Йўқ, мен шу деворни ошиб ўтишим шарт дея, унинг ёнида умрингизни ўтказишни истамассиз, ахир. Бир режангиз амалга ошмадими, унинг атрофида ўралишиб қолманг, қўлингизда минглаб имкониятлар бор, уларни ишга солинг.

Самолёт

Кумуш қанотли қушни танлабсизми, демак, сиз доим баланд парвозларни кўзлайдиган инсонсиз. Тасаввур оламингиз шунчалик кенгки, пушти кўзойнакни таққанча уни айланиб юраверасиз. Реал ҳаётга қайтиш эса хаёлингизнинг бир учига ҳам келмайди. Тағин ҳамма истакларингизни қулфлоғлиқ сандиқда сақлайсиз. Кимдир улардан хабар топса, сизни калака қиладигандек. Сиз мўъжиза юз беради-ю, ҳаммаси ўзгаради, орзулар ушалади, дея хаёл қиласиз. Биз бу ҳаёт мўъжизаларга тўла эканлигини инкор этмаймиз, лекин кўзлаган манзилга етиш учун амалий ҳаракатлар қилиш кераклиги ҳам айни ҳақиқат. Хаёлпарстлигингиз, осмонларда учиб юришингиз туфайли икмониятларингиз чегараланган. Қани, бир ерга қўниб олинг-чи! Бўлмаса, қора булутлар ҳунар кўрсатиб, осмонингизда аҳвол оғирлашади. Бугундан, вақтни бой бермасдан мақсадларингиз ва имкониятларингизни кўриб чиқинг, пухта режалар билан уларни амалга ошириш учун ҳаракатни бошланг.

Шоира ВАФОЕВА тайёрлади.

Шарҳлар

Об-ҳаво: Тошкент
Валюта курси
1