Юзингиздан ажин мўралаб қолмаслигини истайсизми? Ким ҳам буни хоҳламайди дея ўйланиб қолган бўлсангиз, шу бугундан бошлаб асабийлашишни бас қилинг. «Депрессиядаман» деган беўхшов сўзни ҳам унутинг! Борди-ю, назорат қўлдан чиқаётганини сезсангиз, қуйидаги усуллардан бирини ёки барчасини кетма-кетликда синаб кўринг. Келишдик-а?
Елкаларни текисланг!
Тик турган ҳолатда қўлларингизни елкага қўйинг. Ўпкани тўлдириб нафас олинг-да, оёқ учига кўтарилинг. Бу пайтда қўлларни юқорига ҳаракатлантириб, бошни хиёл орқага ташлайсиз. Нафас чиқариш жараёнида дастлабки ҳолатга қайтинг. Машқни 5-6 марта бажаринг.
Кафтингизни очинг...
Машқни тик туриб ҳам, ўтириб ҳам бажариш мумкин. Асосийси, тўғри бажаришда. Демак, иккала қўл кафтингизни қаттиқ сиққанча мушт тугинг. Хўш, уддаладингизми, ана энди муштингизни аста бўшатинг. Яна такрорланг. Ушбу машқ танадаги зўриқишни енгиллаштиришда асқатади. Давомийлиги 8-10 марта.
Қани, ўтириб олингчи...
Ўзингизга қулай бўлган ҳолатда ўтиринг-да, тиззаларни букинг. Қўлларингиз билан тиззангизни қучоқлаб, бошингизни пастга энгаштиринг. Шу ҳолатда 10 сония ўтиринг, сўнг бошингизни кўтариб, чуқур нафас олинг. Машқни истагингизга кўра, 5-6 марта бажаришингиз мумкин.
Танангизни бўшаштиринг!
Бунинг учун тиззалаб ўтирасиз-да, қўлларингизни олдинга чўзиб, танангизни олдинга йўналтирасиз. Имкон қадар, қўллар ёрдамида чўзилишга ҳаракат қилинг. Машқни 10-15 сония бажариш кифоя.
