Янги йил — мўъжизавий байрам! Шу кун дилга туккан, тилга кўчган орзулар ушалишига ишонамиз! Аммо йил якунига келиб, ҳафсаламиз пир бўлиши ҳам ҳеч гапмас. Келинг, бу йил бошқача йўл тутамиз. Руҳшуносимиз сизга орзуларнинг ушалиш йўлларини ўргатади, сиз эса эринмай бу усулларни бажариб кўринг.
1-шарт: орзулар дафтарини тутинг!
Бугун — 28 декабрь. Юқорида айтганимиздек, 31 декабрни кутиш шартмас. Қўлингизга қоғоз ва битта дафтар олинг. Ана энди унга келаётган йилдан кутаётганларингиз ва кўзлаганларингизни ёзинг. Мақсадларингиз ҳаётингизнинг барча жабҳаларини қамраб олсин ва уларни алоҳида-алоҳида саҳифаларга ёзинг. Масалан:
Шахсий ҳаёт:
«Турмуш ўртоғим билан муносабатларимни мустаҳкамлайман».
«Фарзандимни инглиз тилида сайраб кетишига ёрдам бераман».
Карьера:
«Янги иш бошлайман».
Кўнглим учун:
«Римга бораман!»
«30 та янги китоб ўқийман»
Пул:
«Cobalt» машинасини оламан»
Ташқи кўриниш:
«Сочимни «карэ» қилиб кестираман»
«Бурнимни пластик операция қилдираман»
2-шарт: орзулар ўзингизники бўлсин!
Юқоридаги тахминий рўйхатни истаганингизча давом эттиришингиз мумкин. Фақат бу орзулар ўзингизники бўлсин! Мажбурият, талаб юзасидан қилишингиз керак бўлганларини эмас, ич-ичингиздан амалга ошишини истайдиганларингизни ёзинг.
3-шарт: жисмоний ва руҳий имкониятларни ҳисобга олинг!
Мақсадларни чегаралашни назарда тутмаяпмиз. Шунчаки, улар ақлга сиғмайдиган даражада бўлмаслиги керак. Дейлик, сиз олдингизда турган 100 кило тошни кўтара олмайсиз. Аммо 200 кило тошни кўтараман, деб мақсад қиласиз. Оқибатда, буни уддалай олмай, баттар тушкунликка тушасиз.
4-шарт: қўрқманг!
Қўрқув орзуларни чекинтиради. Тасаввур қилинг, ресторандасиз. Официантга ўзингиз севган таомни буюртирдингиз. Агар «Ошпаз бу таомни яхши пиширармикан?» «Официант вақтида олиб келармикан?» «Олиб келгунча қўлидан туширворсачи?» деган хавотирлар билан ёнсангиз, ё гумонларингиз тасдиғини топади, ёки еганингиз билан таом лаззатини туя олмайсиз. Орзу қилдингизми, энди уни очиқ ҳавога қўйиб юборинг. Бу мақсадларни амалга ошириш йўлида ҳаракат қилмай қўл қовуштириб ўтиринг дегани эмас. Шунчаки, ҳадеб амалга ошмаса-чи деган қўрқувга берилманг. Табиат қонуни унутманг: уруғни ерга қадашингиз билан унмайди, орзулар ҳам хаёлга келиши билан рўёбга чиқмайди.
5-шарт: қасдма-қасд йўл тутманг!
Умр йўлдошингиз билан орангизга совуқчилик солмоқчи бўлганларнинг кўзини куйдириш учун у сизни аввалгидек севишини истаяпсизми? Ёки машинасини учириб юрган дугонангизга қараб «Ундан нимам кам?» дея «Cobalt» олиш ташвишига тушганмисиз? Агар кимгадир қасдлашиб ўз олдингизга мақсадлар қўяётган бўлсангиз, чучварани хом санабсиз. Танангиз сизга бўйсинмайди. Яъни у бемаъни мақсадалар уя қурган миянгизга қараб «Сен ақлингни йўқотган бўлсанг, айб мендамас», дея тўнини тескари кийиб олади.
6-шарт: ҳис қилинг!
Бирзум кўзни юмиб тасаввур қилинг, мана, Римга ҳам бордингиз? Нималарни кўраяпсиз? Қандай суратларга тушаяпсиз? Буюртирган пиццангизни олиб келишганда димоғингизга қандай ҳид урилди? Унинг мазасини оғзингизда сезаяпсизми? Худди шундай барча орзуларингиз ушалганда ўзингизни қандай ҳис қиласиз, ўша туйғуни бугуноқ қалбингиздан кечиринг. Бу борада психологик махсус машқ қуйидагича:
Уйингизда иккита жойни белгилаб олинг. Доира ёки бирор шаклни хаёлан ҳам чизманг. Бир томонда ўтириб, бир йилдан кейин худди шу кунда ўзингизни қандай тасаввур қилишингизни кўз олдингизга келтиринг: қўлида машинасининг калити, сочлари карэ шаклида кесилган, ёнида бир даста эри совға қил қип-қизил атиргуллар, ўзиган ишонган ва бахтдан сармаст аёлни кўриб ҳавасингиз келдими? Тушимми ё ўнгимми дейсизми? Іа, бу сиз! Сизнинг келажагингиз. Энди вақти-вақти билан ундан маслаҳат сўрашингиз мумкин. Ахир тажрибаси бор, ҳамма нарсага эришган аёл у. Унинг ўрнига ўтиб, тик турган ҳолда келажагингизнинг энергиясини, ҳисларини туйинг. Тасаввурингизни бойитиб, келажагингиз қиёфасини ўзгартириб бориш имконига ҳам эгасиз.
Янги 2018 йил омадли ва бахтли лаҳзаларга бой келсин! Барча орзуларингиз ушалишишига ишонамиз!
Шоира ВАФОЕВА
