«Болалар кийими савдоси билан шуғулланаман. Кеча бир қиз қўлида рўйхат билан дўконимга келди. «Опа, кўпроқ нарса харид қилсам, нархларини келиштирасиз-а?», деб, бир қојозга, бир растага қараб, болалар учун турли кийимларни кўздан кечира бошлади. Унинг анча нарса танлаганини кўриб, савдом юришишидан хурсанд бўлиб кетдим. Бир пайт 7-8 яшар қизларга тўғри келадиган қизил рангли жемпер сўраб қолди. Бошқа рангдаги, турли безаклалилари бор эди-ку, аммо айнан у истагандек йўқ. Ўн дақиқалар ахтардим-у, хуноб бўлиб:
— Бошқа рангдагисини ола қолинг, қизингиз хархаша қилмас, ёш болага ким қўйипти кийим танлашни, — дедим.
Қизнинг кўзлари негадир ёшланди.
— Ҳеч бўлмаса, уларга кийим танлаш имконини берайлик — деди. Ва қўлидаги рўйхатга кўз тикиб, — Юлдуз шунақасини сўраган-да Қорбободан, — деб яна дўконга кўз югуртирди.
Беихтиёр қўлидаги рўйхатни олдим.
Камол — оқ кўйлак.
Умид — қора шарф.
Меҳрибон — қўғирчоқ.
Юлдуз — қип-қизил жемпер.
Рўйхат жуда узун эди. Савол назари билан тикилган нигоҳларимга харидорим «Меҳрибонлик уйи»да ишлайман. Бу йил Қорбобо бўлиб, болаларнинг истакларини амалга оширмоқчи эдим», дея жавоб берди.
Иккаламиз ярим кун бозорни излаб, қизил рангли жемперни топдик. Ўзим бирор бор кўрмаган Юлдузнинг Янги йил куни кутган совғасидан кўзлари порлашини тасаввур қилиб, юм-юм йиғладим...
Болаларга танлаш имконини берайлик...
