Бир пайтлар Калифорниянинг Непа водийсида улкан ошқовоқ етиштирган киши дунёга машҳур бўлиб кетганди. Унинг 933 килограммлик ошқовоғи экспонатга айлантирилиб, ўзи яхшигина мукофот пулига эга бўлди. Калифорнияники каби катта бўлмаса-да, ўзимизда ҳам улкан қовоқ етиштирилган. Самарқанд шаҳрида истиқомат қилувчи Муқимжон Орипов узоқ йиллардан берииқлимимизга хос бўлмаган гул, дарахт ва полиз экинларини парваришлаб келади. У 2014 йилда қовоқнинг “Кукурбита максима” ҳамда “Атлант гигант” каби турларини ўз томорқасида ўстирди. У етиштирган “Кукурбита максима”нинг баландлиги 75 сантиметр, айланаси эса бир ярим метрдан ортиқ бўлган. Оғирлиги 60 килограмдан зиёд. “Атлант гигант”нинг бирмунча бўйи паст бўлса-да, эллик килограммдан кўпроқ тош босади.