► E-mail манзилингизга кучли парол ўрнатинг. Парол учун содда сўз ёки рақамлардан фойдаланманг. “SplashData” фирмаси маълумотига кўра, ўтган йили энг кўп ишлатилган пароллар 12345, 12345678 ва qwerty бўлган. Бундай паролларни бузиш ёки қўлга киритиш учун эса хакер бўлиш шарт эмас. Иложи борича паролингизда бош ҳарфлар, рақамлар ва махсус белгилар жамланмасидан фойдаланинг. Масалан, “яхшилик” деган оддий сўз ва ҳарфлардан иборат паролни “ЯхшилиК1!” шаклида ҳар хил белгилардан иборат мураккаб паролга айлантиришингиз мумкин.
► Электрон почта паролидан бошқа сайт ёки онлайн хизматларда фойдаланманг. Ҳар бир сайт учун алоҳида парол танлашингизни тавсия қиламиз.
► Ёдда тутиш учун паролларни компьютерингизда ёки бошқа онлайн ва электрон қурилмаларда сақламанг. Уларни қоғозга ёзиб олинг ва ҳеч ким билмайдиган жойда сақланг.
► Жамоат компьютерларидан фойдаланганда ҳар доим ишлатиб бўлгандан сўнг сайтдан ёки электрон почтадан чиқишни унутманг. Бунинг учун “Chiqish”, Logout” ёки “Выход” тугмаларини босишингиз керак. Тизимдан чиқмасдан туриб ойнани (браузерни) ёпсангиз, ундаги барча маълумотларингиз сақлаб қолинади ва саҳифани кимдир қайта очганда сизнинг маълумотларингиз чиқиб келади. Жамоат компьютерлари деганда кутубхона, интернет кафелардаги ёки бировга тегишли бўлган компьютерларни тушуниш мумкин.
► Бир неча одамга битта мактубни юборишни истасангиз, e-mail манзиллари ҳаммага кўриниши мумкинлигини ҳисобга олинг. Мактуб олган томон бу мактуб юборилган бошқа e-mailларни кўрмаслигини истасангиз, почта манзилларини “Bcc” (Gmail ва Yahoo каби инглиз тилидаги почта хизматларида) ёки “Скрытая копия” (Mail.ru каби рус тилидаги почта хизматларида) қаторига киритинг. Шунда битта мактубни олган бир неча одам бир-бирининг электрон почта манзилини кўрмайди. Бу муҳим, чунки мактуб юборилган томонлар электрон манзилининг ўзи билмаган бошқа одамларга кўринишини истамаслиги мумкин.
