МАРҲУМ ​ЖАСУРБЕК ИБРОҲИМОВ ИШИ БЎЙИЧА АЙБЛАНУВЧИ ЖАНЖАЛ ТАФСИЛОТЛАРИНИ АЙТИБ БЕРДИ

29 сентябрь куни Тошкент шаҳар Миробод тумани жиноят ишлари бўйича судида Боровский номидаги тиббиёт коллежи 2-курс ўқувчиси Жасурбек Иброҳимовнинг ўлими юзасидан навбатдаги суд мажлиси бўлиб ўтди.

Унда судланувчи Тўлаганов Исломнинг кўрсатмалари тингланди. У 3 май куни марҳум Жасурбек билан бўлган жанжал тафсилотларини айтиб берди.

Судья судланувчидан “Дастлабки терговда берган кўрсатмаларингизни тасдиқлайсизми?” деб сўради. Судланувчи “ҳа” дея жавоб берди. “Жасурбекка аввалдан ғаразингиз бўлганми” деган саволга у “йўқ” дея бўлган воқеани сўзлаб берди.

“2016 йил ноябрь ойида Ибрагимов Жасурбек билан танишганман. Жасурбек менга анчадан бери боксга боришини, травма олганини, кўз косаси чиқиб, сатресения олганини айтган. Шу гапдан кейин бир-биримиз билан салом алигимиз бор эди.

2017 йил 2 май куни ўқишга келаётганимда 3-босқичда ўқийдиган Абдуллаев Дилшодбек Ибрагимов Жасурбек билан гаплашиб туришган экан, мен олдиларидан сўрашиб, “тинчликми” деб сўрадим. Абдуллаев Дилшодбек унинг синглисига марҳум Жасурбек гап отиб, СМС ёзиб юрганини айтди. Кейин мен Дилшодбек акамга Жасурбек билан урушмаслигини, у аввал травма олганлигини айтдим. Кейин биз “бешни олиб” ўқишга кириб кетдик.

Ўқишда бир биримизни кўрдик, у индамади. 3 май куни тахминан соат 2 ларда мен дарсдан хожатхонага чиқдим. Хожатхонадан қайтаётганда мен Жасурбек, Темур ва Бегзодларни кўрдим. Улар билан сўрашиб, салом-алик қилдик. Кейин Жасурбек мендан нега касал деб айтганимни сўради. Мен унга 2016 йилда бу ҳақда ўзи айтганини айтдим.

Кейин у менга четга чиқишимизни, коллежнинг чиқинди ташлайдиган жойига ўтишимизни айтди. Кейин биз Темур, Бегзод ва Жасурбеклар билан у ерга бордик. У менга яна шу саволни берди, мен унга тушунтирмоқчи бўлаётган пайтим у тўсатдан мушти билан чап юзимга уриб қолди.

Мен унга қараб “довольно” дедимда кетдим. Урушганимиз йўқ, урганим йўқ, чунки травмаси борлигини билардим. Кейин корпусимга кириб кетаётганимда, у “кўчага чиқ сен билан бирга-бир урушаман” деди. Мен эътибор қилмасдан ичкарига кириб кетавердим. Хонамга кетаётганимда орқамдан Жасурбекнинг курсдоши Собиров Бегзод келиб, кўчага чиқишимни, Жасурбекнинг гапи борлигини айтди.

Кейин хонамга кирдим, сумкамни қўйиб, кўчага чиқдим. Кўчада 4 нафар бола турганди: Байзатов Темур, Жасурбек, 3-босқич талабаси Ҳурматбек ва Тўхтаев Темур. Кейин Темурбек мендан нима бўлганини сўради, мен бўлган воқеани айтиб бердим. У “ҳеч нарса бўлмаган эканку, битта коллежда ўқийсизлар, беш ташашларинг” деди. Кейин Жасурбек мен биринчи уриб қўйдим, энди урушаман деб турволди.

Кейин Темур акага қараб, мен урушмиман уни травмаси борлигини биламан дедим. Жасурбек “хоп, урушмимиз гаплашиб оламиз” четда деди. Кейин секин 145-мактаб томонга бориб, мактабни орқасидаги гаражлар томонга ўтдик. У ерда Жасурбек кўйлагини кейин майкасини ечди ва урушишни бошлади. Менга қараб ҳужум қилаётганда мен “блок” қилдим (қўлларим билан юзимни тўсдим). Кейин қўлимни туширганимда, қўлимнинг оғриғини сездим, кейин у орқамга ўтиб, “захват” қилди. Шунда мен унинг устига йиқилиб тушдим, у мени тагимда қолиб кетди. Кейин ерда думаладик. 3-курс талабаси Ҳурматбек бизларни ажратиб юборди, мени итариб, кет деб, кейин мен у ердан кетиб, кўйлагимни ечиб, устимни қоқаётганимда орқамдан Ўлмас исмли ўртоғим бақириб қолди, орқамдан қарасам Жасурбек югуриб келаётган экан, яланғоч ҳолатда, мен қўрққанимдан оёғимни кўтариб қолдим, оёғим қорнига тегди, кейин у йиқилди ерга. Кейин ўрнидан туриб, йўлни юзига чиқдик. Ҳурматбек сув олиб келди Жасурбекни бурни, чап қошини тепасидан қон оқаётган эди. Кейин сув билан ювинди. У ерда қандайдир корхона бор экан, ўша ерда ишлайдиган 2 та қиз чақирди ва Жасурбек билан Бегзод кириб кетишди. Бурнидан пахта тиқиб чиқишди. Кейин Ҳурматбек “ҳаммаси яхшими травматологияга борамизми” деб сўради. Жасурбек ҳаммаси яхшилигини айтди. Мен ҳам сўрадим, кейин “беш ташлашдик” ва у ердан кетдик. “Корзинка” томонга юрдик. Бегзод билан Жасур ўша ерда қолди. Темурга қараб “хонамга сумкамни олиб чиқиб бер” деди. Кейин бизлар Ҳурматбек, Темур ва Ўлмас ўқишга қайтдик.

Ўқишга кирганимда хонамга бордим, хонада дарс тугабди. Ошхонага бордим, у ерга Темур билан Бегзод келди. Темурга қўнғироқ қил дедим, у қўнғироқ қилиб, Жасурдан ҳол аҳвол сўради, у ҳаммаси яхшилигини, ҳозир ухлашга ётишини айтди. Шу билан мен ўқишдан уйга кетдим.

Эртаси эрталаб деканим телефон қилди ва ўқишга етиб келишимни айтди. Ўқишга бориб, деканни хонасига кирдим. Кейин менга Жасур реанимацияга тушганини айтишди. Шундан сўнг 1 соатдан кейин Миробод ИИБ ходимлари келишди, барча у ерда бўлганларни олиб кетишди. Онамга қўнғироқ қилиб чақирдим. ИИБда бизни сўроқ қилишди, бўлган воқеани айтиб бердим. Қўлимга ручка қоғоз беришди, мен қўлим травма бўлгани учун ёзолмаслигимни айтдим, ўрнимга онам ёзиб берди. Кейин 14-касалхонага бордик. Жасурни аҳволи оғир экан. Декан, куратор ва Жасурнинг онаси ўша ерда эди. Кейин кўчага чиқиб, адамга телефон қилдим. Улар етиб келдилар. Дадам билан реанимацияга Жасурбекни олдига кириб чиқдик. Жасурбек биз билан кўришди ва адамга қараб, “яхши бўлади, яхши бўлиб кетаман” деди. Кейин у ердан чиқиб кетдик. Эртаси, 5 май куни кириб, дадам билан соат 10 ларда больницага бордик. Адам ўқишга боришимни, ўзлари эса Жасурбекни МРТга олиб боришларини айтдилар.

Кечки пайт адам билан больницага бордик, Жасурни соат 20-21 да операцияга олиб кириб кетишибди. У ердан яна уйга кетдим. 12 ларда операция тугади. Ота-онам келиб Жасурнинг аҳволи оғирлигини айтишди. Жасурбек тузалиши учун қўлдан келганча ҳаракат қилдик.”

Судга раислик қилувчи Матчонов Ислом Тўлагановга айрим жиҳатларга ойдинлик киритувчи саволлар берди. Шулардан бири айбланувчининг Туркияга бориб келгани ҳақида бўлди.

Тергов давомида Тўлаганов ўзидаги асабийликни йўқотиш мақсадида учиб кетганлигини маълум қилган.

“1 июнь куни соат 7 ларда Туркияга жўнаб кетдим. У ерда опачам бор хабар олиб кетишга кетгандим. 5 кунга бориб келишим керак эди.”

Ислом жанжал 2 дақиқа давом этганлигини айтди.

Ўша пайт атрофингиздагилар нима қилишди деган саволга улар ажратишга улгуришмаганлигини маълум қилди.

Ташаббус кимдан чиққанлиги ҳақидаги саволга бир неча бор “билмадим” дея жавоб берди.

Жабрланувчининг адвокати судланувчидан вазни ва бўйи ҳақида сўради. Тўлагановнинг жавоби "бўйим 178, вазним 86."

Адвокатнинг судланувчининг олган тан жароҳатлар ҳақидаги саволга Тўлаганов ўзи сатресения олганини ва 7 май куни "Жуковский" больницасига мурожаат қилганини айтди. У бошини рентген, синган бармоғини гипс қилдирганини ҳамда "Рублёвка" томондаги касалхонада 12 дан 20 майгача, 8 кун ётиб чиққанини маълум қилди.

Жасурбек Иброҳимов ўлими юзасидан илк суд эшитуви 26 сентябрь куни бўлиб, унда марҳумнинг онаси жабрланувчи Нилуфар Алимова кўрсатма берганди.

Эслатиб ўтамиз, Тўлаганов Исломбек Ўзбекистон Республикаси ЖКнинг 104-моддаси 3-қисми «д» банди (жабрланувчининг ўлимига сабаб бўлган қасддан баданга оғир шикаст етказиш) аломатларини содир этганликда айбланмоқда.

Суд кейинги мажлисни 2 октябрь кунига белгилади. Унда гувоҳларнинг кўрсатмалари тингланади.