Saudiya Arabistoni mamlakat neft zavodlariga uyushtirilgan hujumda Eronni aybladi (Video)

Mamlakat mudofaa vazirligi 14 sentyabr kungi hujumlar vaqtida ishlatilgan dronlar va raketalarning bo`laklarini namoyish etdi. Bu haqda Euronews nashri xabar berdi.

Mudofaa vazirligi rasmiy vakili Turki-al Maliki Eron tomonidan tajovuzkorlikning davom etayotgani, mamlakat tomonidan turli terrorchilik guruhlarining qo`llab-quvvatlanayotgani, yuk kemalarining erkin harakatlanishiga nisbatan qo`llanilayotgan to`siqlar barcha uchun birdek xavf tug`dirayotganini ta`kidlab, xalqaro hamjamiyatni Eronning mintaqadagi dushmanlik harakatlariga e`tibor qaratishga chaqirdi.

Eron prezidenti maslahatchisi Hisomiddin Ashena o`zining tvitter sahifasida Saudiya mudofaa vazirligining bayonotiga nisbatan javob qaytardi: "Hujumlarga Tehronning aloqadorligi to`g`risidagi ushbu bayonot Ar-Riyodning dronlar va raketalar aslida qaerdan uchirilganini aniqlay olmayotganing isboti. Ular hattoki hujumlarni nima uchun qaytara olmaganini tushuntira olishmayapti", deya yozuv qoldirdi. Ar-Riyodga kelgan AQSh davlat kotibi Mayk Pompeo esa ushbu hujumlarni Eron aynan o`z hududi orqali amalga oshirganini ta`kidladi. Bunga javoban Eron prezidenti Hasan Ruhoniy "Yolg`on ayblovlar o`rniga oyoqqa turayotgan xalqlar kuchini hisobga olish lozim” ekanligini ma`lum qildi.