2019 yilning 15 avgust kuni kechqurunga yaqin vaqtda Toshkent shahar Ichki ishlar bosh boshqarmasi patrul-post xizmati xodimlari Mirobod tumanining Mirobod ko`chasidagi ko`p qavatli uy oldida bir necha qog`oz qutilar yotganligini aniqlagan.
Shubhali ko`ringan qutilar haqida ular Mirobod tumani 2-sonli ichki ishlar bo`limiga xabar bergan.
Voqea joyiga etib kelgan O`zbekiston Respublikasi Ichki ishlar vazirligi Maxsus operasiyalarni muvofiqlashtirish boshqarmasining Portlash xavfi bo`lgan predmetlarni zararsizlantirish bo`yicha maxsus otryadi xodimlari etib kelgan. Ular tomonidan qutilar tekshirilganda, ichi bo`sh qutilar ekanligi ma`lum bo`lgan.
Voqea joyida o`tkazilgan tezkor surishtiruv ishlari jarayonida qoldirib ketilgan qog`oz qutilar shu ko`chadagi uylardan birining birinchi qavatida joylashgan oyoq kiyimlar savdosi bilan shug`ullanuvchi do`kon xodimlari tomonidan qo`yib ketilganligi aniqlandi.
Ushbu voqea yuzasidan Ichki ishlar vazirligi Jamoatchilik va ommaviy axborot vositalari bilan aloqalar boshqarmasi rasmiy xabar berdi. Xabarda hech qanday vahimaga hojat yo`qligini, biroq aholidan har qanday sharoitda ham hushyorlikni yo`qotmaslik so`raldi.
