Toshkent viloyatining Toshkent tumanidagi Fayzobod mahallasida 60 o`rinli “Angels” hamda Ko`hinur mahallasida 50 o`rinli “Qalb nur kids” nodavlat maktabgacha ta`lim muassasalari foydalanishga topshirildi.
Shu munosabat bilan tashkil etilgan tadbirda viloyat va tuman hokimliklari mas`ullari, davlat va jamoat tashkilotlari vakillari, mahallalar faollari va yoshlar ishtirok etdi.
Mamlakatimizda yosh avlodning jismonan sog`lom va ma`nan etuk insonlar bo`lib ulg`ayishi, zamonaviy bilim va kasb-hunarni puxta egallashi uchun barcha sharoit yaratilayotgani ta`kidlandi.
Muassasalar yumshoq va qattiq mebellar jamlanmasi, maxsus krovatlar, musiqa asboblari, turli o`yinchoq va boshqa zarur jihozlar bilan ta`minlangan. Hovlida bolalar o`yin maydonchasi, mo``jaz bog` barpo etilgan. Jamoa malakali tarbiyachi va shifokorlardan iborat. 
Bugungi kunda mamlakatimizda uzluksiz ta`lim tizimining muhim bo`g`ini bo`lgan maktabgacha ta`limni rivojlantirish va faoliyatini takomillashtirish, tarbiyalanuvchilar uchun qulay sharoit yaratish yuzasidan keng ko`lamli islohotlar amalga oshirilmoqda. Xususan, joriy yilning mart oyida xuddi shunday maktabgacha ta`lim muassasasi Bekobod shahri va Chinoz tumanida ham ochilgan edi.
Ayni paytda Toshkent tumanida maktabgacha ta`lim yoshidagi 17 mingdan ziyod bola bor. Hududda faoliyat yuritayotgan 36 maktabgacha ta`lim muassasasi 4 ming 823 tarbiyalanuvchini qamrab olgan. 
Joriy yilda viloyat miqyosida davlat-xususiy sheriklik asosidagi 228 nodavlat MTM tashkil etilishi mo`ljallangan.
